ƏMANƏTLƏRİN SIĞORTALANMASI FONDU BEYNƏLXALQ TƏŞKİLATLAR İLƏ ƏMƏKDAŞLIĞI GENİŞLƏNDİRİR

2 oktyabr 2019-cu il

Əmanətlərin Sığortalanması Fondunun nümayəndələri 2019-cu ilin sentyabr ayı ərzində bir sıra beynəlxalq tədbirlərdə iştirak ediblər.

Fondun nümayəndələri 18-20 sentyabr 2019-cu il tarixlərində Əmanət Sığortaçılarının Beynəlxalq Assosiasiyasının (İADİ) Asiya-Sakit Okean Regional Komitəsinin Koreya Respublikasının Seul şəhərində təşkil etdiyi Təhsil proqramında iştirak ediblər. Səfər çərçivəsində iqtisadi böhran və böhrandan çıxış yolları, maliyyə sabitliyinin qorunması, əmanətlərin sığortalanması sisteminin maliyyə sabitliyinə tövhəsi, bu sahədə informasiya texnologiyaları sistemində yeniliklər müzakirə edilib.

Bundan əlavə, 25-28 sentyabr2019-cu il tarixlərində Əmanətlərin Sığortalanması Fondunun nümayəndələri Bosniya və Herseqovinanın Sarayevo şəhərində Avropa Əmanət Sığortaçılarının Forumunun (EFDI) illik toplantısında iştirak ediblər. Kecirilən toplantıda Avropa ölkələrinin əmanətlərin sığortalanması fondlarının nümayəndələri risk əsaslı ödənişlərin tədbiqi, əmanətlərin sığortalanması prinsiplərini müzakirə ediblər, EFDI-yın İdarə Heyətinə seçkilər keçirilib, təşkilatın büdcəsi təsdiq edilib.

Maliyyə Sektorunun Müasirləşdirilməsi Layihəsinin ikinci fazası çərçivəsində Dünya Bankının və İsveçrənin İqtisadi Məsələlər Üzrə Dövlət Katibliyinin Bakıda səfərdə olan nümayəndə heyətləri ilə 16-26 sentyabr 2019-cu il tarixlərində əmanətlərin sığortalanması sistemi barədə geniş müzakirələr keçirilib.

Müzakirələrdə Əmanətlərin Sığortalanması Fondunun fəaliyyəti, gələcək inkişaf modeli və hədəfləri, bankların ləğv olunması və əmanətlərin sığortalanması sahəsində potensialın gücləndirilməsi, bu sahədə qanunvericilikdə dəyişikliklər müzakirə edilib.

Son Xəbərlər