Fond Naxçıvanda “Əmanətlərin sığortalanması sistemi və hüquqi bazanın öyrənilməsi” mövzusunda təlim keçirilib

Azərbaycan Respublikası Mərkəzi Bankının Naxçıvan Muxtar Respublikası İdarəsi, Əmanətlərin Sığortalanması Fondu və Naxçıvan Universitetinin birgə təşəbbüsü ilə Əmanətlərin Sığortalanması Fondunun rəsmiləri tərəfindən “Naxçıvan” Universitetinin müəllim və tələbə heyəti üçün “Əmanətlərin sığortalanması sistemi və hüquqi bazanın öyrənilməsi” mövzusunda təlim keçirilmişdir.

Tədbiri giriş sözü ilə açan Universitetin rektoru dosent Anar Kazımov bu tipli tədbirlərin ali təhsil müəssisələrində təhsil alan tələbələrə tədris edilməsinin əhəmiyyətini qeyd etmiş, gələcəkdə də adıçəkilən tədbirlərin davamlı olmasını məqsədəuyğun hesab etmişdir.

Sonra Azərbaycan Respublikası Mərkəzi Bankının Naxçıvan Muxtar Respublikası İdarəsinin sədri Elçin Əliyev tədbirin əhəmiyyətinə toxunaraq cəmiyyətdə daha savadlı və məlumatlı istehlakçı seqmentinin formalaşdırılmasında bu cür tədbirlərin həlledici rol oynadığını vurğulamışdır.

Tədbirin irəliləyən zamanında, videobağlantı ilə tədbirə qoşulan Əmanətlərin Sığortalanması Fondunun Himayəçilik Şurasının sədri, Azərbaycan Respublikası Mərkəzi Bankının Baş direktoru Toğrul Əliyev Naxçıvanda bu mövzuda ilk dəfə təlimin keçirildiyini və bundan sonra da region əhalisinin, xüsusilə də gənc nəslin maliyyə savadlılığının artırılması ilə bağlı tədbirlərin davam etdiriləcəyini bildirmiş və iştirakçılara uğurlar arzulayaraq nitqini sonlandırmışdır.

Təlim zamanı, Fondun təcrübəli əməkdaşları tərəfindən əmanətlərin əhəmiyyəti, əmanət yerləşdirilməsi zamanı nələrə diqqət edilməli və risklərin qiymətləndirilməsi mövzularında tədbir iştirakçılarına məlumatlar çatdırılmış, iştirakçıların mövzu ətrafında sualları ətraflı cavablandırılmışdır.

Sonda, Azərbaycan Respublikası Mərkəzi Bankının Maliyyə savadlılığı şöbəsinin rəisi Xumar Hüseynova Mərkəzi Bank tərəfindən “Maliyyə savadlılığı” layihəsi çərçivəsində hazırlanmış resurslar barədə auditoriyanı məlumatlandırmış və tələbələri maraqlandıran sualları cavablandırmışdır.